DE LA PASIÓN DE NUESTRO SENOR JHESÚXRISTO
Estrofas 1059-1066

Los que la ley avemos de Xristos a guardar
de su muerte devemos dolernos e acordar.

Cuentan las proficias lo que sse ov' a cunplir:
primero Jeremías cóm' avia de venir;
diz' luego Ysayas que avya de parir
la Virgen, que sabemos Ssanta María estar.

Diz' otra proffeçía de aquella vieja ley
que'l Cordero morría e salvaría la grey,
Daniel ya lo desía por Xristos nuestro Rey
en David lo leemos, segunt el mi cuydar.

Com' profeçías disen e que ya se cunplió,
vino en Santa Virgen e de Virgen nasçió,
al que todos bendiçen, por nos todos morió,
Dios e ome, que vemos en el santo altar.

Por salvar fue venido el lynage umanal,
ffue de Judas vendido por muy poco cabdal,
fue preso e ferido de judíos muy mal,
este Dios, en que creemos, fuéronlo açotar.

En su faz escopieron, del çielo claridat,
espinas le pusieron de mucha crueldat,
en la cruz lo sobieron, non avían piadat,
d'estas llagas tomemos dolor e grand pessar.

Con clavos l' enclavaron las manos e pies dél,
la su set abrebaron con vinagre e con fiel,
las llagas, que l' llagaron, son más dulçes que miel
a los que en él tenemos esperança syn par.

En cruz fue por nos muerto, ferido e llagado,
e después fue abierto d' ascona su costado:
por estas llagas, çierto, es el mundo salvado.
a los qu' en Él creemos, Él nos quiera ssalvar.