Cantar de Mío Cid. Folio 47r

Ferran gonçalez non vio alli dos alçasse nin camara abierta nin torre
Metios sol escanno tanto ouo el pauor
Diego gonçalez por la puerta salio
Diziendo dela boca non vere carrion
Tras vna viga lagar metios con grant pauor
El manto e el brial todo suzio lo saco
En esto desperto el que en buen ora naçio
Vio cerçado el escanno de sus buenos varones
Ques esto mesnadas o que queredes uos
Hya sennor ondrado Rebata nos dio el Leon
Myo çid finco el cobdo en pie se leuanto
El manto trae al cuello e adelino pora Leon
El Leon quando lo vio assi envergonço
Ante myo çid la cabeça premio e el Rostro finco
Myo çid don Rodrigo al cuello lo tomo
E lieua lo adestrando enla Red le metio
A marauilla lo han quantos que y son
E tornaron se al palaçio pora la cort
Myo çid por sos yernos demando e no los fallo
Mager los estan lamando ninguno non Responde
Quando los fallaron e ellos vinieron assi vinieron sin color
Non viestes tal guego commo yua por la cort
Mandolo vedar myo çid el campeador
Muchos touieron por enbaydos los yfantes de carrion
Fiera cosa les pesa desto que les cuntio

CXIII

Ellos enesto estando don auien grant pesar