Cantar de Mío Cid. Folio 74r

Grado al Rey del çielo mis fijas vengadas son
Agora las ayan quitas heredades de carrion
Sin verguença las casare o a qui pese o a qui non
Andidieron en pleytos los de nauarra e de aragon
Ouieron su aiunta con alfonsso el de Leon
Fizieron sus casamientos con don eluira e con donna sol
Los primeros fueron grandes mas aquestos son miiores
A mayor ondra las casa que lo que primero fue
Ved qual ondra creçe al que en buen ora naçio
Quando sennoras son sus fijas de nauarra e de aragon
Oy los Reyes despanna sos parientes son
A Todos alcança ondra por el que en buen ora naçio
Passado es deste sieglo el dia de cinquaesma
De xpistus aya perdon
Assi ffagamos nos todos iustos e peccadores
Estas son las nueuas de myo çid el campeador
En este logar se acaba esta Razon
Quien escriuio este libro del dios parayso amen
Per abbat le escriuio enel mes de mayo
En era de mill e .C.C xL.v. annos
Es leydo dat NOS del vino si non tenedes dineros echad
Ala vnos pennos que bien vos lo daran sobrelos