Cantar de Mío Cid. Folio 46r

El obispo don iheronimo vistios tan priuado
Ala puerta dela eclegia sediellos sperando
Dioles bendictiones la missa a cantado
Al salir dela ecclegia caualgaron tan priuado
Ala glera de valençia fuera dieron salto
Dios que bien touieron armas el çid e sus vassalos
Tres cauallos cameo el que en buen ora nasco
Myo çid delo que veye mucho era pagado
Los yfantes de carrion bien an caualgado
Tornan se con las duennas a valençia an entrado
Ricas fueron las bodas en el alcaçar ondrado
E al otro dia fizo myo çid fincar .vij. tablados
Antes que entrassen a iantar todos los quebrantaron
Quinze dias conplidos duraron en las bodas
Hya çerca delos .x.v. dias yas van los fijos dalgo
Myo çid don Rodrigo el que en buen ora nasco
Entre palafres e mulas e corredores cauallos
En bestias sines al .C. son mandados
Mantos e pelliçones e otros vestidos largos
Non fueron en cuenta los aueres monedados
Los vassallos de mio çid assi son acordados
Cada vno por si sos dones auien dados
Qui auer quiere prender bien era abastado